Nýlenda

Nýlenda var reist árið 1883. Áður hafði þar staðið torfbær sem bar sama heiti og var gatan, Nýlendugata, kennd við það hús. Árið 1907 var búið að gera endurbætur á húsinu og byggja við það inngönguskúr. Nýlenda er steinbær, þ. e. langveggir hússins eru hlaðnir úr tilhöggnu grjóti en gaflar byggðir úr timbri. Steinbæir eru að mestu sér-reykvísk húsagerð og voru aðallega byggðir af tómthúsmönnum. Húsið hefur baðstofu og eldhús auk riss og inngönguskúrs. Nýlenda var flutt á Árbæjarsafn 1973 og er núverandi sýningu ætlað að sýna tilgátuheimili tómthúsmannafjölskyldu um það leyti sem Danakonungur, Friðrik VIII, heimsótti Ísland árið 1907.