Kornhúsið er annað tveggja pakkhúsa verslunarfélagsins Ørum & Wulff sem stóðu upphaflega á Vopnafirði, reist um 1820. . Kornhúsið var einkum notað fyrir innflutning, s.s. korn en gegndi öðrum hlutverkum síðar meir. Þar bjó skáldið Kristján fjallaskáld Jónsson síðustu æviár sín og andaðist í húsinu 1869. Þegar rífa átti húsin árið 1975 ákvað Þjóðminjasafn Íslands að taka þau niður og flytja til Reykjavíkur, og voru þau endurreist á Árbæjarsafni. Þjóðminjasafnið gaf safninu húsin árið 1992 í tilefni af 25 ára afmæli þess.
Almennt gegndi húsið hlutverki pakkhúss, þ.e. vöruhúss, þó eru til heimildir um að á 19. öld hafi það einnig verið notað til búsetu. Frægasti íbúi þess er eflaust Kristján Jónsson fjallaskáld, en hann var ráðinn sem barnakennari á Vopnafirði árið 1868. Hann lést þar ári seinna.
Neðri hæð hússins hýsir tímabundnar sýningar en efri hæðin er nýtt sem funda- og veislusalur.
